早排唔少議員關注在囚人士喺監倉待遇，有在囚人士就同NGO反映，話監倉分發嘅雞翼成日大細不一，如果分到件細嘅真係唔多夠食；而監倉限定大時大節嘅晚餐先有雞髀食，囚友覺得唔多夠喉，公民黨立法會議員譚文豪臨危受命，已經透過預算案開支提問，掀起一場監倉「雞翼革命」。

政府各部門準備緊回覆議員有關預算案嘅開支提問，據知譚文豪今年就做咗囚友大使，接連提問囚友權益，由飲食同如廁再到探監問題，佢都一一關注，其中有兩條向懲教署嘅提問成為當中亮點，包括要求政府增加撥款，令所有在囚人士每逢有雞翼嘅飯餐，都由一份雞翼改為兩份，同時將大時大節晚餐先有雞髀食，增加至每星期都總有一餐雞髀宴。

爭取每日可用16格廁紙

譚文豪同八方講，係有NGO向佢反映囚友意見，所以代佢哋發聲，覺得相對政府啲大白象工程億億聲，加多一隻雞翼又使得幾多錢吖？一旦政府say no，佢話至少都要解釋點解啲雞翼有大有細，係咪批次不同、抑或撈亂批次嚟分派？

食完飯有乜做？唔使八方講，大家都知喇，譚文豪都好細心，關心埋囚友嘅如廁問題。佢問及署方能否增加撥款，令在囚人士每日可使用唔少於平均16格嘅廁紙？因為囚友意見係，𠵱家每日平均8格真係唔多夠用。佢亦都問緊政府可唔可以考慮提供中醫服務，並叫政府增撥資源擴建探監室，同埋增加探訪時間同次數，估唔到譚文豪由上空到監獄都一一關顧到。

李八方