韓國女天團少女時代（少時）噚日以7人姿態出席MBC「2015DMZ和平音樂會」做表演嘉賓，當中剛剛甩拖嘅允兒仲做埋大會主持㖭。

當晚少時就以壓軸嘉賓身份出場，演出新歌《Party》，原本成個演出都好順利，去都尾聲時，當少時行緊出T台時，大會仲喺台嘅四邊噴晒煙花，個畫面都幾震撼吓。

點知大會就好心做壞事，啲煙花就似乎噴得過分咗，搞到成個台都係煙，啲煙花仲要同少時表演個位勁近，搞到少時行到出去嘅時候畀啲煙搞到嗆親，徐玄、泰妍、孝淵忍唔住用手撥走啲煙，又用手遮口，Yuri仲用雙手遮面，仲要周不時避煙花，搞到場面有少少亂！

不過，允兒同秀英就好專業，即使畀煙圍住但都笑笑口完成整個表演，去到完晒成首歌先撥煙，而收音亦收到少時咳嘅聲，似乎佢哋忍咗好耐。

有網民見到少時條演出片段之後，都留言鬧爆大會話佢哋靠害，亦有人戥少時可憐。