香港移民數目急增，稍有能力都嚷著要走，在瑞典生活了30年的李群玉，卻選擇在香港兵荒馬亂之際，與在瑞典出生成長的獨生子李研琛，齊齊回流香港父子檔創業。餐廳大變細，由可容納過百食客的異國唐人街，到租大埔小舖偷位面壁地盡其用，勉強湊夠16座位，難得這對「下凡」父子兵仍四萬咁口。「你去過外國生活，就知香港有幾好」。離家千里圍村爸爸思鄉情切可以理解，奇在說這話的，是日做十小時、週日父親節還得為別家父親煮不停的「番書仔」小琛！

記者 呂麗嬋

「香港真係一片福地，不過住得耐，大家唔覺咋」。穿著全套白色廚師服，趁下午「落場」時間受訪的李研琛一再強調，唯恐記者不信。8、9 0年代香港出現移民潮，「太空人爸爸」不少，但像大小琛父子倆一類移民多年，「太空人仔仔」一大學畢業，就急著回港與爸爸團聚的，卻不多見。「爸爸退休，想返香港生活，嗰時我又未畢業，咪遲少少先返，我哋都好鍾意香港，呢度咩都方便」。

申請上網，電訊公司有24小時熱線；六點後落樓，餐廳仍燈火通明，已叫李研琛感動不已！「你喺瑞典，上網至少要申請一星期以上，咩都慢，連烏蠅都飛得慢過人」。瑞典位處北歐，香港人對它的認識，包括宜家、肉丸和北極光；北歐國家嘛，寧靜美麗生活悠閒兼福利好，父子倆卻不以為然。「去旅行同喺度生活係兩回事，日日去睇極光都悶啦」。父子倆異口同聲。

80年代朋友介紹越洋到瑞典打工，邊做邊學廚，李爸爸說30年前的瑞典，華人少，北歐人對中餐要求不高，一碟竹荀炒牛肉，已是名物。「香港人嫌普通，又話荀毒無益，喺瑞典就好受歡迎」。90年代轉做老闆，他形容是近水尾的黃金時代。「到後期，愈嚟愈多難民，稅制又一改再改，賺100萬，70萬交稅」。世上無免費午餐，福利好有代價，讀書免學費，週街大學生，僧多粥少，讀包裝設計的小琛，畢業後能否學以致用，也是現實。

既然肉丸之鄉找不到出路，難得合拍的50後與80後兩父子決定拍住上，由香港重新出發，主力由長大成人的小琛創業「楂fit」，是成是敗，一家人承擔。如是者，小店菜單以阿仔最愛的西餐為主，偶爾也有「水牛芝士肉餅」搞搞新意思。「以前喺瑞典，佢都成日喺廚房幫手，好鍾意煮野食」。爸爸負責「中菜部」，阿仔負責「西餐部」，但其實小小廚房，就得父子兩個大廚，記者同爸爸傾計，阿仔就去煮食，交叉走位，阿媽駐水吧，主力催單！

兩地生活節奏不同，要適應，早有心理準備，小琛年輕，初戰江湖，響往開放式廚房，覺得同客人可以有傾有講，實戰下發現麻煩多多。「開放式廚房係好，但呢度午市好似打仗」。結果又由開放變唔開放，交了學費，但樂天的他笑說也有得著。有時定菜單也會與爸爸意見不合，愛煮西餐的他，擺碟似綉花，實戰型的老豆，口裡不說，眼神見「異采」。好在兩父子都不記仇，不要說隔夜，一個鐘之後，已忘記得七七八八。

兩父子拍住上，還有李媽媽監場做幫工，這個鐵三角，確是無敵。「唔好成日諗住辛苦，就唔會好辛苦，以前喺瑞典，做咩都一家人，依家都係，喺屋企都要煮嘢食，咪當呢度係屋企囉」。李媽媽說。週日父親節，兩父子謂沒計劃怎樣慶祝，期望爆場，就是最佳禮物。「做我哋呢行，平時已經日日煮，煎扒煎到手軟，過節反而想食豬腸粉」。磨拳擦掌準備為其他父親慶祝的李爸爸笑著說。