姚松炎喺九西補選入到閘之時，眾志周庭卻喺港島區被篩走，唔少人都覺得「操刀手」選舉主任鄧如欣，有乜理由咁大權力篩人走？八方同事都好想知道鄧如欣篩人嘅因由，噚日朝早8點就去到東區民政事務處入口，希望向鄧如欣請教佢作決定嘅理據，點知等候其間至少5名自稱「特遣隊」嘅便衣警員上前查問係咪嚟等選舉主任、並查詢傳媒機構身份，其間仲一直在旁監視，估唔到選舉主任動向，咁受關注。
直至約8點56分，八方同事見到接載鄧如欣嘅白色政府私家車出現喺東區民政總署旁嘅愛勤道，其間座駕內後座疑似鄧如欣見記者影相，即時舉起手提電話，車輛最後駛入東區民政處停車場，記者試圖上前採訪但不果。

後嚟記者就按保安要求喺大樓地下登記，要求到民政處等候採訪鄧如欣，但最終當記者表明希望查詢鄧如欣有關立法會補選嘅問題時，接待傳媒嘅職員就話選舉主任「開緊會」，並派發網上公開嘅政府電話簿資料，叫大家如有問題可以向新聞主任聯絡，強調鄧如欣好忙，暫時未安排到傳媒採訪佢喎。
而噚日就有兩位前高官，分別為鄧如欣作咗呢個決定而抱不平，曾任保安局局長嘅新民黨葉劉淑儀話，若要判斷眾志政綱係咪違反憲法等，唔係選舉主任可以決定，「應該要請教政制局長」，佢話唔係想追究邊個做決定，但提到「個個官員都出嚟話選舉主任決定」，覺得「將責任推晒落鄧如欣身上唔公道」。前公務員事務局局長王永平亦喺報章專欄質疑，「講常理，我們可以想像一名公務員作出違反政府立場的『獨立』決定嗎？」
據知鄧如欣今午兩點半要出席東區區議會大會，唔知民主派有冇嘢問佢？

李八方