今次（6日）跑國際騎師錦標賽，總共編有九場，在有得追的B跑道舉行，頭場提早6時30分pm開跑。騎師錦標賽四場有均勢，相信會有一番激烈爭鬥，從往績所見經常出冷門。從馬房實力看，霍利時、賀賢及告東尼可優先留意。

第一場五班1650米，「贏馬神器」今季初出跑谷草1200米已推介，可惜懶性重太被動，只能追近跑殿軍。上仗轉戰田草1400米由潘明輝執韁，早段又太落後，一條直路追趕，拉士交22秒97全場最快時間，表現確唔曳。復課由潘頓接手，親自操四課，拍跳有追勢，埋門單試懶性大減主動肯走，四歲遲熟質新馬現階段才踏入正軌，今次返快活谷跑一哩，加強配搭用潘頓擺出搏殺格，騎練今季合作成績唔錯，最近「善傳千里」便出擊得手。

同場「同明相照」今季跑一場唔太曳，復課史卓豐接手，操足而來，埋門谷閘有前有後已試準，加上有配備轉變，隨時可推翻大局。「戈寶」已連場硬拼，幸好體重喼得到，埋門拍跳反映對其體力有信心，可爭三甲。「銘記心中」越戰越勇，馬身脹卜卜，復課試閘有追勢，配莫雷拉是前列分子。「龍城快勝」連課拍跳都主動佔先，「料事如神」質新進步，都是邊線馬。