當年今日

讚特殊兒童其實好叻
應采兒整愛心蛋糕

蘋果日報 2002/02/27 00:00


應采兒昨日任特殊兒童裝飾蛋糕比賽的評判,她表示自己以往在美國讀書時,亦曾和特殊兒童相處,且非常開心,並指他們好叻。
應采兒昨日聯同約三十位全港各大酒店名廚及十二位特殊兒童,出席在灣仔君悅酒店的「協康會第十一屆全港名廚精英大滙演」宣傳活動。
各大名廚聯同十二位小朋友分別組隊,為蛋糕加上鮮果、朱古力等做裝飾競賽,而應采兒則擔任評判,只見身穿紅色雞翼袖T恤的應采兒在各小朋友進行比賽時,不時左穿右插,還偷偷放朱古力入口,十分鬼馬。

不抗拒殘疾童
應采兒與一班小朋友玩得十分投入,其後她自己亦嘗試裝飾蛋糕,不過穿雞翼袖T恤的她卻不慎春光乍洩。
問應采兒知否是次參與活動的部分小朋友身體有殘疾,她連忙說:「玩嗰時唔知,後尾就知。我唔會抗拒佢哋,佢哋咁得意,加上佢哋個樣都唔似。」

返美國考車牌
應采兒續說:「以前喺美國讀書時,校方會特別安排每班有一、兩個特殊兒童,佢哋重好叻,每朝早餐食嘅餅都係佢哋整,等佢哋有一技之長,而同佢哋相處都好開心,成日玩埋一齊,佢哋重會叫得出我哋啲名。」
另外,最近忙於為電影《鬼魅人間》趕戲的應采兒,表示此戲將於日內煞科,稍後她會返回美國休息兼順道考車牌,她笑說:「喺美國啲路較熟,初頭嚟香港過馬路時,連左右都搞唔清。」
採訪:馮美茵
攝影:何國豪