政圈盛傳被DQ嘅九龍西前立法會議員劉小麗好快會撤回上訴申請，意味立法會即將又舉行補選。民主派一早共識由小麗親自披甲，但由於佢嘅自決立場極大機會被二度DQ，所以有傳佢已經拜訪唔同人士，物色佢如果被DQ後嘅Plan B人選，據知佢已經有心水人選嘞。

或請泛民前輩出山

據知小麗總結上次補選經驗，物色Plan B人選時都想搵有地區工作經驗、照顧基層嘅從政者，綜合各方消息，人選可能係民協副主席、區議員楊彧。八方問過楊彧，佢話暫時唔打算參與補選，若然參選都要睇黨嘅安排，佢暫時都係準備緊明年嘅區議會選舉。
若然民協唔放人參選，估計小麗都會有兩手準備，佢或會邀請泛民老前輩出山，公民黨梁家傑或工黨李卓人都有機會係游說對象。點解唔喺小麗民主教室內搵人？八方聽聞小麗希望大局為重，所以希望由泛民接納嘅人參選，唔會亂咁欽點。
至於近日人氣極高、獲民主黨力谷嘅大律師吳思諾，有指吳思諾形象太中產，同打開基層民生議題出身嘅小麗格格不入，相信非小麗Plan B人選。