【狗仔出更】失婚裕美同林作拖手仔斷正 一講戀情開心喪笑
蘋果日報 2020/06/23 20:05
裕美麥明詩林作
31歲裕美出道17年，事業遠不及感情生活精采，2016年被爆背夫偷食大台小生黃子恆，形象曾直插谷底。不過，兩年前裕美已重新出發，跟外籍男友Alex分手後，再火速跟十優港姐冠軍麥明詩舊愛林作撻着，去年1月裕美與林作被踢爆同遊北海道，幾個月後再被爆同居疑雲，但兩個人依然拒絕公開認愛。
不過，《蘋果》昨晚目擊二人撐枱腳後拖手仔離開，有片有真相，拖手斷正的裕美被追問戀情時更笑到「腰果眼」，甜蜜到痺。
《蘋果》昨晚接獲讀者報料，指林作與長髮女友到尖沙嘴海港城一餐廳撐枱腳，二人晚上9時50分才入座，一入餐廳即坐在角落位置，讀者指林作女伴雖然戴住口罩，未能清楚看到面容，但驟眼看十分清秀。記者接報後趕到現場，大概11時許，果然見到林作與長髮女友手拖手離開餐廳，原來讀者口中的清秀女子，正是2018年傳與林作撻着的裕美。兩個人戴住口罩十指緊扣行去停車場繳費處方向，裕美孭住一個約值3萬多元的黑色Boy Chanel手袋，襯以身上黑裙，倍添幾分貴氣，由於當時商場人流不多，二人亦「安心拖手」，只是每當碰見有人經過便自動鬆手彈開，保持距離。
記者上前追問林作是否拍拖，他連聲否認說：「唔係唔係唔係！食飯之嘛！」反觀身旁的裕美就笑得十分開心，就算隔住口罩都完全可以感受得到。記者指目擊他們拖手仔，難道也不算拍拖？林作即以高8度聲線反問：「係咩？」發展多久？林作依然耍手擰頭說：「冇啦冇啦！」裕美則繼續笑得十分開心，但就耍手拒絕回應拍拖。二人乘電梯到停車場取車，記者恭喜林作，他竟口快快回應：「多謝多謝。」
今日記者致電裕美，講到昨晚目擊她與林作手拖手，裕美反問：「係咩？」是否與林作拍拖？裕美一味笑及支吾以對，然後問：「你有冇打畀林作？」是否待林作公開戀情自己才公開承認？裕美笑住說：「我唔知呀！」記者表示片中見到她笑得十分開心，裕美反問：「好開心咩？我不嬲都咁開心㗎。」對於讀者形容林作女伴樣子清秀，裕美說：「多謝佢咁樣話我喎。」難道拖手也不是拍拖？裕美堅持由林作發言：「你不如等林作答你啦。」記者致電林作，他以短訊回覆說：「本人自上一段戀情學到，一旦回應戀情會被視為炒作及博上位，因此早已宣告不會回應任何緋聞。更害怕對方藝人視我為借佢上位。本人也向廣大網民們道歉 - 不好意思又佔用了他們的時間，導致他們要在新聞下面留言說報道我是多麼的無聊和無必要。」林作這個回應，似乎已默認他與裕美戀情。
現年30歲的林作，2017年與麥明詩正式分手後同年年尾，跟裕美一起出席麥玲玲飯局認識，林作當晚一見裕美已經嗒糖，有傳之後林作經常發訊息冧裕美，2018年10月裕美邀林作為她直播節目任嘉賓，林作忽然對住鏡頭說：「我今晚上嚟係想教大家一堂課，叫做橫刀奪愛，絕對冇問題！我阿媽細個就教我：『喜歡嘅，就去搶！』」由於當時裕美仍在跟外籍男友Alex拍拖，一度傳林作撬Alex牆腳，而直至同年12月，裕美於IG宣佈回復單身，難免令人聯想到林作成功撬牆腳。
-----------------------------
裕美與林作在海港城食飯後手拖手離開。
二人十指緊扣，拍拖鐵證如山。
裕美穿平底鞋，莫非要襯返林作高度？
裕美笑到變腰果眼。
就算被撞正拖手，林作也否認拍拖。
裕美孭住約值3萬多元的黑色Boy Chanel手袋。
裕美耍手擰頭不肯回應拍拖。
入電梯後裕美繼續甜笑。
2013年12月，裕美與林恩浩結婚，直至2016年6月被踢爆與黃子恆發展婚外情而離婚收場。（資料圖片）
黃子恆因偷食人妻裕美而形象直插谷底。（資料圖片）
十優港姐麥明詩與林作於2016年冷戰，翌年分手。（資料圖片）
林作曾扮女人出席活動，跟裕美公然打情罵俏。（資料圖片）
林作2017年出席麥玲玲飯局時，已對裕美嗒糖。 （資料圖片）
31歲裕美對林作戀情不置可否。 （資料圖片）