大台嘅頒獎禮今晚舉行，憑《BB來了》成為大熱視后人選之一嘅李佳芯，今晚身穿低胸晚裝、就同同劇嘅黎諾懿一齊現身紅地毯，李佳芯表示今日嘅戰衣噚晚先決定好，問到成為視后大熱嘅佢，依家緊唔緊張？佢就話：「仲未緊張，依家要着得靚靚咁行出嚟，等一陣坐喺台下面就應該會控制唔到，會緊張喇。」

至於視后仲有陳煒、黃智雯等勁敵，問李佳芯到有冇信心攞獎，佢就話：「一定要有，去到今晚我將一半信心畀自己，一半信心畀同事、我嘅好對手。」問佢有冇諗定攞獎要多謝乜人，佢就話：「有，其實一有提名就要諗定，因為有時啲嘢講唔埋，諗定有預備反而冇咁緊張，如果唔諗突然叫你就驚啲喇。」真係有會唔會喊？佢話：「我唔知喎，但一定會喊，不過喊有好多種，我內心一定會喊先。」

精選娛聞，喺晒《娛果》
http://fb.com/appledailyent