張敬軒今日於麗嘉酒店舉行《HINSIDEOUT 張敬軒演唱會》記者會，個唱於6月15至17日在紅館舉行。

今日中環發生珠寶劫案，剛巧軒仔就喺案發現場樓上嘅髮型屋整頭，發生劫案之後五分鐘，軒仔經過案發現場，軒仔話：「見到店舖啲玻璃碎咗，警察啱啱到場拉起封鎖線，自己聽到都好心寒，平時都會企喺舖頭門口等車，有時都望吓啲鑽飾，自己都震驚，喺香港做咗十幾年嘢，好少發生呢啲事，希望警方盡快破案。」 講到懷疑涉案人士係非中國籍，軒仔笑言：「自己去到東南亞國家旅行，通常都俾人叫我行番國民通道，因為自己個樣似非中國籍人士。」

軒仔今次演唱會搵咗印度髮型師幫佢設計造型，軒仔話到時可能整個「牛池灣孔劉」造型， 印度髮型師幫軒仔整咗個低溫火燒頭髮造型，軒仔話：「演唱會期間未必能夠做到，到時可能燒第二個位置，或者燒背脊，當拔火罐。」 軒仔喺網上討論區見到好多fans話唔想經常聽hit歌，例如《櫻花樹下》，軒仔表示會採納意見，唱啲平時少唱嘅歌。

軒仔話今次有創舉，一張演唱會飛可以睇兩個人嘅演唱會，問佢係咪分上下半場？佢話冇咁簡單，暗示係「降兩度」同佢兩個演出。軒仔今次有壓制炒黃牛飛情況，佢話非常有效，令到香港同埋大陸歌迷都能夠買到飛，至於演唱會嘉賓，佢話保持神秘，暫時唔公開，不過透露嘉賓係三棲藝人。

精選娛聞，喺晒《娛果》
http://fb.com/appledailyent