【更新內容】
韓國新婚女星宋慧喬和EXO小分隊EXO-CBX嘅成員伯賢、Chen和Xiumin噚日飛抵北京，今早佢哋就聯同南韓總統文在寅出席喺北京國家會議中心舉行嘅中韓經貿合作交流會。

而根據韓媒《韓聯社》報道，由於今次文在寅訪華，有多個韓國傳媒《韓國日報》、《每日經濟》等媒體都有到北京採訪，報道指喺上午10時50分，當文在寅喺發表演講後走向中央通道之際，當時現場嘅攝影師及記者都想跟住文在寅離開，點知就遭到現場大陸方面嘅警衛阻止。

韓國記者即時表達不滿，未知是否言語不通關係，令雙方發生肢體衝突。據報道指當時隨行嘅青瓦台警衛隊不在現場，而有兩名韓國攝影記者喺推撞期間受傷，並移送到北京市區醫院接受治療，據知一名攝影記者眼角流血兼感到頭暈。

南韓方面通過外交部向中方提出抗議，並希望中方查明事件真相，追究有關人員責任。根據韓國消息方面指，現時南韓方面已着手調查中方警衛嘅身份，據了解警衛應屬於大韓貿易投資振興公社（KOTRA）喺當地聘請嘅警衛，同時文在寅得知情況後亦對事件表示擔憂。而韓媒報道亦指根據相關人士表示，大陸公安負責現場警衛安排，故此公安喺指揮方面亦應該有責任。

青瓦台官亦就事件進行緊急會議，由於事態嚴重，故會通過外交渠道處理，並會要求中方查明事件真相及追究相關人士。

更多韓流，喺晒《娛果》
http://fb.com/appledailyent