Now爆谷台舉辦嘅「喪玩喪SEE號X今晚打喪屍」活動今日喺鑽石山舉行，除咗情侶檔白只同顏卓靈之外，吳家麗同王敏奕等都有份出席。白只同顏卓靈台上同司儀傾偈，介紹電影《今晚打喪屍》裏面打喪屍嘅武器，示範點樣打喪屍。

其後白只同顏卓靈受訪時，話對票房有信心，對於張繼聰話將票房交畀白只，因為佢係金馬獎同金像獎最佳男配角，之前攞過好多電影獎，白只話：「我唔係親耳聽到佢講我唔會回應，不過我相信佢都會咁樣講，希望香港觀眾會鍾意我哋呢部電影。」

講到呢部戲同韓國電影《屍殺列車》都係喪屍片，驚唔驚啲人會比較？顏卓靈就話：「好唔同，因為我哋呢套本土元素重咁多，講嘅都係香港社會獨有嘅議題，希望大家有共鳴。」

問佢哋情侶檔演出係咪特別開心？見佢哋喺活動上都玩得好開心，白只話：「我哋係公然工作，冇拍拖。」記者講笑問佢哋係咪分咗手，白只即刻好尷尬好緊張咁話：「有冇搞錯呀？講啲咁嘅嘢，我哋係工作時工作，拍拖時拍拖。不過今次真係好開心，因為我同顏卓靈對手戲真係好少嘅，所以佢拍緊嘅時候，我可以光明正大喺個mon度欣賞佢囉，因為如果一齊演戲真係好容易會分心。」

講到萬梓良冇現身，吳家麗就話：「萬子係我哋秘密武器，佢喺廣州，因為太多生意做啦，不過6月29號首映嗰日佢會出席。」吳家麗話對票房好有信心，因為而家華語片成績好好，佢話：「香港人始終鍾意睇番廣東話嘅電影，唔駛追字幕追得咁辛苦。」至於王敏奕就話呢部電影係佢打女生涯嘅第一部，之後拍咗一部關於MMA嘅網劇，佢話：「呢套劇好特別，着住婚紗由頭打到尾，自己造型好似喺漫畫度跳出嚟。」問佢幾時着真正婚紗時，佢就話順其自然。