馬天佑噚晚現身由家夢控股成立嘅新公司「新新傳媒」，佢仲係呢間公司目前簽約嘅唯一藝人，所以噚晚都有喺現場演出，仲又唱又跳演繹新歌《親愛的你好嗎》。

不過，乜馬天佑唔係同「明福俠」黎明嘅唱片公司A Music有合約咩？馬天佑接受《蘋果》訪問就話：「同A Music嘅合約已經完咗喇，我哋合作咗一年，超開心，Leon真係超好人，忙都爆都肯幫我做MV導演。」

咁點解又唔留喺A Music？馬天佑就話自己入行日子尚淺，想試唔同嘅嘢，除咗唱歌仲有好多嘢想做想試。佢又話：「Leon係一個好open嘅好老闆，雖然o依家大家冇合約關係，但係將來一定有其他合作。」

講到新公司吸引佢嘅地方，馬天佑話自己好幸運，遇到嘅人都好肯俾機會佢，而佢加盟呢間公司，除咗會以網紅身份同網民互動，仲會幫呢間公司做創意總監，對佢嚟講又係一個新嘗試。