水貨大亨袁仁祥生意愈做愈旺，人亦豪爽咗，𠵱家去日本「公幹」唔再坐UA而改搭CX，雖然貴幾百蚊，但級數唔同。上個禮拜返港，同班航機就有時裝才女W，雖然佢坐經濟客位，但舉止行為卻似頭等乘客，令袁仁祥學唔少嘢。
落機後，袁仁祥宴請傳媒朋友於新發茶餐廳用膳，點起從機場買來的免稅煙：「下個禮拜Nigo揸旗嗰檔BathingApe終於喺紐約開第一間海外專門店，聽講星光熠熠，到時唔止我哋走水貨嘅忙碌，相信你哋班潮記都有排忙，捕住啲書鬥快剪相刊登，認真陰功。想起以前我未走水貨前，同你哋一樣咁陰功，搵朝唔得晚，後尾轉行走裏原宿水貨，不經不覺已六年幾，𠵱家生活先叫做安穩啲。」

佢歎氣話：「睇住日本猿人舖由樓上店ConceptShop搬落街舖變成BusyWorkshop，設計師由揸維他奶變成揸法拉利；炮台山間樓上舖生意唔夠做被迫執笠，反而我由一間舖變成兩間，重Plan緊趁CEPA入內地搞大佢，實行同BAPE一齊衝出家鄉！撈咗咁多年，最難忘係遭人白眼，幾年前有個『利時』開舖嘅Designer走嚟鬧我，話我唔應該喺日本入貨嚟香港炒賣，應該學佢咁推動香港創意工業，點知幾年後嘅佢，已放棄理想，𠵱家幫個藝人做助手，唉，陰功咯！」

主持人：大食Jack
八卦熱報：[email protected]