那時候是1976年，文化大革命結束，27歲的施永青人生有一次重要嘗試，不是搞二次革命，而是第一次參加維港渡海泳。42年後的今天，施永青仍然喜愛「跳海」，明年三月70歲的他，曾自言之後不再參加渡海泳，不過率性的他轉頭說「要游到醫生唔肯寫紙為止」，活出其「盡性生活」之座右銘。

70年代，施永青坦言人命冇咁矜貴，渡海泳不設水試，「嗰時就咁跳落去咋，過一陣先敢伸個頭上水面，好多人喺後面跳落海啊。」當年他瘦骨嶙峋，不諳水性，站在皇后碼頭岸邊預備落水時，「隔離有個阿叔話：『o靚仔，你咁瘦，因住抽筋啊。』」

稱自己有地中海貧血症的施永青，帶氧量不高，「都係意志力架咋，去到某個位，身體適應咗，好似第二呼吸咁，持續一段比較長嘅時間。」香港人早年未有環保意識，「游游下水，有舊米田共經過。以前啲人咩都扔晒落海。」皇后碼頭游到對面尖沙咀，「水流幾急下，見到有人沖咗水西環，有人沖咗去銅鑼灣，當年冇篩選過嘛。」

施永青那個年代尚未發迹，在新昌做office boy，負責影印，「嗰時住荔枝角，好窮，但游泳池要錢架，所以去游維港。」施永青小時候游水靠自學，曾經差點浸死，「10歲8歲嘅時候，荔枝角仲有泳棚，本身一直都可以掂地，點知有次潮漲，掂唔到地，好彩嗰時離地不遠，仲搵到個平衡。」

未識死的老施，多年來對水情有獨鍾，一見到水就想跳落去，基本上是不顧規矩，「有次喺希臘，酒店隔離係海，我就游咗去對面個島，點知係監獄。」另一次是在瑞士洛桑，天氣好凍，「我同天鵝游水，阿女話唔畀我游，唔係驚我有事，因為嗰度寫住話唔可以游水。」又有一次在尼泊爾都跳海，「游游下，我爬咗隻大象上面，好彩冇揈我落嚟。」

「旅行見到水就會游，遊山玩水，我真係玩緊水！」好多人去旅行只會影相留念，游水係五官體驗，「喺陸地上有重力，但喺水入面就好似飛緊咁，你要上就上、落就落，唔受日常煩惱影響。」

「今年70歲唔係游得幾耐，年紀大，體力衰退，踎低起身都要搵嘢扶下。」施永青對渡海泳沒有成績目標，「游到過去就得啦。」但計劃下年3月後不再渡海，即今年有機會是最後一屆，不知是否踏入從心之年，他轉頭改口風，「游到醫生唔肯寫紙為止。」

擁有億萬身家，富豪總有幾招養身之道傍身，施永青不認為游水是養生，對這個詞語更是失笑，「我做人嘅宗旨係盡性生活，特別要去養生都係負擔，朝聞道夕死可矣就得啦！人都係死路一條啫，養咩生，養極都死，點解要做啲徒勞無功嘅嘢。」

施永青除了見海就跳，不挑食亦是其生活態度，「咩都食，可以食、鐘意食嘅嘢，都對身體有益！」咁日日食炸雞都得？「我有食炸雞啊，油有脂肪，雞有蛋白質，點解唔食得？你一定係未試過冇嘢食，以前隔離農場發雞瘟先有雞食，發瘟雞煮熟就得啦，食唔死人嘅，化學雞就話唔食啫。」

記者：周家誠