懷疑喺香港PoPo全程監視下被送中嘅12港人，家屬到今日仲未有機會同佢哋直接接觸，上個月底大陸公安單方面公佈咗偵查終結，仲話會將佢哋移送人民檢察院審查起訴，一至兩周內會開審，唔經唔覺已經過咗個半星期，但事件未有進展。嚟緊星期六12月12日，亦係12港人被送中第112日，有黃店就發起熄燈行動，希望香港人唔好忘記12港人。

今次行動希望串連全港黃店喺當日中午12時12分，即係12/12嘅12:12，集體「熄燈一分鐘」，希望用呢一分鐘閂燈營業時店舖中嘅漆黑，提醒各界繼續關注12港人現時處境，同時向12港人以及佢哋家屬親友表示支持。發起行動嘅人仲諗得好周到，提埋顧客到時可以打開手機電筒功能，象徵為12港人喺黑暗囚禁中點燈。呢個行動如果有夠多黃店響應，八方相信一定會引起國際傳媒關注，就算用地球上任何一種語言，呢種國際線都肯定同制裁無關，只係一種良知同人性嘅表現，不過有一種至今唔肯回應自己有冇上過飛行服務飛機嘅物體，就唔會理解到囉。