昨日唔少股份在開市前出現大手成交,搞到小初撲朔迷離。經紀黃話,呢啲通常係外資行將貨轉倉嘅現象。
經紀黃又話,咁多隻大手成交股份中,要特別留意莎莎國際(178),據講有鳳凰盤殺到,兼且隻股噚日公布業績正斗,可以睇高一線。
莎莎噚日公布全年業績,成功由虧轉盈,股東應佔溢利有6546.3萬元,兼派末期息4仙。查實去年莎莎蝕錢,一樣有4仙股息派,加上沙士風暴的影響,將在下次中期業績內反映,因乜理由經紀黃會睇好?
經紀黃話,噚日莎莎有手1900萬股大成交,造0.90元,佔咗全日成交股數82%,而股價亦因業績靚仔,升5.56%,收0.95元。呢手大成交聽聞係由一位芬佬買入,值得憧憬。
家陣臨近6月底,芬佬就快夠鐘做半年結,冇理由唔造好股價,畀莎莎股價跌破買入價0.90元。
究竟經紀黃嘅陰謀論成唔成立,睇埋今個月底就知道。
慕容小初