衛蘭（Janice）早前喺King Jer搞嘅網上靚聲王投票入面，擊敗容祖兒、陳奕迅同張敬軒等成為靚聲王。「蘋果動搞作」呢日就搵嚟出爐靚聲王Janice做訪問，順手叫佢試下幫自己個訪問錄VO，睇下佢係咪真係咁靚聲！

記者：倩宜　攝影：仇志德

一開始錄VO，Janice就已經遇到問題，唔識睇中文嘅佢，要記者逐句讀俾佢聽，再自己寫低拼音先搞得掂，靚就靚聲喇，不過淨係錄兩句VO（即係大家係片頭聽到嗰兩句），都已經錄咗十幾take喇，加上Janice有幾句讀得唔太正，所以VO方面都係交返俾專業人士讀喇。

講到贏咗靚聲王冠軍，Janice話自己都好意外，仲話榜內好多位歌手都係自己欣賞嘅歌手：「真係好開心同埋有少少驚訝，全部都係我欣賞嘅歌手，我諗緊個投票嘅系統係咪有問題出現咗。」Janice知道自己做咗靚聲王之後，除咗拍片多謝King Jer之外，佢仲宣佈出年一月會舉行紅館演唱會，問到佢係咪要開始保養好把靚聲？Janice話：「都係，平時都係飲室溫嘅水，唔好太熱，煎炸同辣嘅食物就盡量唔好開騷前食。」

唔少人都覺得Janice係樂壇嘅滄海遺珠，連佢本人都話聽過呢個講法：「都聽過有人話我係滄海遺珠，我覺得係好事，起碼有人知道有呢把聲。我好感恩，因為呢次投票，令我自己仲有人欣賞我唱歌。」有網友覺得Janice係「成也黎明，敗也黎明」，唔知佢又點睇？「Leon佢真係好相信我，係事業上好幫我好多，我覺得有啲嘢，都唔係可以由佢控制。人有起落係好事嚟，提醒我仲可以係呢個樂壇唱歌係一種榮幸。」至於問到佢介唔介意俾黎明話佢「肥過電單車」？Janice就笑晒咁話：「真係唔介意，我初頭以為佢讚緊我，我覺得電單車幾型丫，所以依家我都係用呢個角度嚟睇。」Janice仲話如果要揀一款電單車嚟形容自己，佢會揀Harley-Davidson添！

髮型：Haysses Ip＠HAiR
化妝：Samuel＠江中平化妝室
服裝：5cm、Plotz
場地提供：Maison ANT Nouveau啟斯藝術坊