43歲葉文輝（啤梨）早前喺fb玩直播向女友Michelle求婚成功（新聞連結： http://bit.ly/2wG0b9v ），《蘋果》今日喺婚姻註冊處見到入紙登記，啤梨喺電話表示：「前日好靜靜雞同未婚妻去入紙，屋企人擇咗日子，12月頭註冊先，擺酒仲未訂到場地，原來今年係好旺，搵場地有啲棘手。」

啤梨話簽紙嗰日只會有雙方親人出席，擺酒趕唔切年尾搞，應該要等出年：「好想邀請自己尊重嘅前輩家燕姐同偶像陳慧琳嚟飲，希望佢哋見證自己嘅人生大事。」遲啲啤梨同未婚妻會去外地影結婚相，順便旅行：「希望擺酒之前有藉口放假，去幾個地方旅行影相，韓國、布拉格、台灣都想去，其實我好耐冇放假，好慘，今次都要自私啲，做唔做都係咁，不如同另一半享受吓生活，好多地方都冇同佢去過旅行。」

問到婚禮花費係咪好多？啤梨笑笑口話：「未知呀，o依家只係入咗紙，幾百蚊啫。好想計劃一個新式結婚程序，希望不斷約識影相嘅朋友去旅行，佢幫我影埋就正嘞，我返嚟只係執相，同埋唔係一定着婚紗咁娘。」記者笑佢利用朋友，慳番筆影相錢，啤梨大笑：「係呀，我冇錢呀，朋友都想同我去旅行，佢哋都好開心，哈哈。」