滬港通未開波，港隊控球權已被搶，不是嗎？恒指即市走勢同滬綜指如同餅印，但每次高低位都係滬綜指造先，然後恒指照抄。A股收市後，恒指波幅100點都唔夠，火花指數係零，正式通車後，相信情況會更明顯，尤其AH同步上市股份。學少林足球強雄話齋︰「球證、旁證、足協、足總、足委、全部都係我嘅人，點夠我打呀。」
既然未能擊敗他，唯有迎合他。作為港隊散戶，有必要多加留意A股行情，炒乜概念，因為直接影響港股表現，能力許可不妨小注怡情，有錢銀關係嘅事情，點都會上心啲。喺呢度順便賣賣廣告，投資版下周一起新增「滬港股大茶飯」專欄，除有每日A股市況點評、重心個股研究、技術走勢分析外，還會請來專家論勢，及講解A股術語等，老手初哥都咁啱睇，萬勿錯過！

利信達蓄勢旗形

光棍節正式完結，半日成交362億人仔，已打破去年全日紀錄，意味今年成交隨時double上，商家生意亦節節上升，半日天貓有12家店舖銷售過億，手機、服飾、家具、電器樣樣齊，難怪阿里巴巴股價隔晚已再創新高，直逼120美元。港股有乜炒？本欄早前推介主打女裝鞋嘅利信達（738），已屆最後上車機會，簡單再講下賣點︰旗下中低檔品牌CNE年初登陸天貓，短短半年已有錢賺，品牌已打入首30位，證明行啱路線，今次光棍節有望更上一層樓，日線圖正營造旗形，相信公佈銷情之日，就係突破之時！

唐牛
https://www.facebook.com/tongcow88