國務院公佈設立「雄安新區」，被官媒唱好為「千年大計，國家大事」，想唔炒至奇，但恒指星期一僅升149點，清明過後今日，中午收市已經倒跌，大家都覺得呢單嘢計唔到數，有排都未殺到埋身，對投資市場嚟講，口號流於實際，但更重要嘅係，大陸資金炒唔炒。

金隅貴為龍頭股，喺佢2015年年報Ctrl F去search吓容城、安新同雄縣，係「0」個結果；而金隅位處河北市項目，同「雄安新區」距離仲遠過北京同天津市，事前連龍頭股都唔發展呢一區。金隅最大受惠「雄安新區」嘅因素係持有旗下河北水泥龍頭冀東水泥約50%股權，既然冀東水泥一注獨注受惠「雄安新區」，又喺A股上市，大媽又何需要買金隅呢？

「雄安新區」消息喺上星期六見光，結果金隅就賺咗星期二清明節假期前A股同港股通休市一日，資金逼住鬥快反映消息，喺香港狂掃金隅。今日A股復市，概念股供應大增，金隅於是先急升後回，皆因佢股價表現，或許已經反映A股冀東水泥連續幾日升停板。長遠而言，金隅呢個政策概念，仲要畀控股公司折讓。

或許拜得神多、自有神庇佑，金隅股價得以連升兩日，但呢一刻市賬率依然1倍唔夠，就反映市場事前根本睇唔起呢隻股，或許本來經營能力遜於其他水泥股，所以估值一直低殘。上述幾個因素七除八扣之下，吸引力已經欠奉。

晉佳

掌握財經生活資訊，即Like「蘋果ATM」fb專頁啦！
http://fb.com/appledailyatm