韓國「馬舞女」泫雅嘅師妹團CrystalClear(CLC)早前加入香港童星出身嘅莊錠欣(ELKIE),以6人之姿回歸樂壇,日前到SBS《人氣歌謠》打歌,師兄陸星材仲親臨現場支持。
CLC師兄BTOB成員陸星材當日作為節目《人氣歌謠》主持人,由朝早綵排開始忙到直播完結,但佢仍然抽時間去CLC嘅休息室為師妹打下氣。而CLC亦都好識做,近日就透過官方SNS對陸星材表示謝意:「為咗慶祝《人氣歌謠》首播而嚟嘅主持人陸星材前輩,BTOB同CLC都加油。」並公開咗同陸星材嘅合照,有唔少粉絲留言大讚可愛,又話靚仔靚女十分養眼。
另外,女團TWICE台灣成員周子瑜同隊友志效早前錄製綜藝節目《同床異夢》,而節目前日播出。佢哋一出場就展現咗激烈嘅舞台表演,仲話佢哋平日喺宿舍都係咁樣玩,完全吸引眾人嘅目光。網民仲紛紛留言表示:「點解子瑜可以咁靚?」、「TWICE果然係大勢女團。」令子瑜再次成為熱門話題。而TWICE嘅真人騷節目《TWICE優雅的私生活》亦於噚晚播出咗第二集,子瑜噚日喺節目播出前特地透過Facebook公開靚相,提醒粉絲要準時收睇節目。