排名趕過告東尼!練馬師起完冷孖 企定定Chok樣擺Pose
潘頓蘇偉賢競駿會競駿時代
由一群年輕成員組成的競駿會,在港養馬出賽已有一段日子,近年風頭減弱,旗下馬多數戰績欠佳。但今晚(29日)谷戰第三場四班1200米,競駿會成功憑蘇偉賢馬房之「競駿時代」重響勝鼓。此駒第13次出賽由潘頓一放到底開齋,人馬首度合作即贏,單Win及組合獨贏A2分別派82.5及31.5元。
四歲英國自購馬「競駿時代」係競駿會三匹現役馬「競駿千里」、「競駿時代」、「競駿高飛」其中之一。近兩場「競駿時代」分別跑第四及第三,成績日益理想,今次換上潘頓,出戰從未上名的谷草短途1200米,9檔起步順勢埋欄,就此由頭帶到尾贏2.25馬位,造就競駿會季內首次贏馬,至於潘頓上個賽日全軍盡墨,今晚亦告重開勝利之門。
訓練「競駿時代」的蘇偉賢,連同頭場由柏寶爆冷贏23倍「靚先生」,連續第二次谷草夜賽起孖,馬房運氣返晒嚟,目前有37Win,一下子由練馬師榜第六位,升回第四位,暫時排名仲高過告東尼。賽後蘇偉賢企定定一副Chok樣擺個靚pose給記者拍攝,好不風騷。
蘇偉賢表示「競駿時代」排九檔形勢不太好,賽前與潘頓商量戰略對策,蘇偉賢話他傾向讓馬兒留住跑,不過潘頓建議放頭。蘇偉賢表示十分尊重騎師的想法,所以聽從建議,如果出閘順利就放頭跑,結果一放而回。蘇偉賢表示「競駿時代」之前減了不少分,目前評分有利,由於馬仔細細,應該跑快活谷最好。
第三場前四名有冷有熱,第二名由大熱門「勝在煌」拎到,鞍上人雷神今晚仲未贏馬;第三名係落飛熱門「辣辣椒」;第四名則為半冷門「勁皇子」,四重彩派9,330元。