長實(1113)兩年多前公佈荃灣西站新盤命名「海之戀」成為一時熱話，被批肉麻，就連著名填詞人林夕當年也撰文《去海之戀吖唔該》。樓盤名面世兩年多，今日入伙，直擊的士司機究竟懂不懂「海之戀」，卻換來「吓！邊度嚟㗎？」的答案。

記者由距離樓盤約七分鐘車程的荃灣多層停車場大廈乘坐的士，劈頭跟司機說：「唔該，去海之戀吖」結果揸的士逾38年的士司機陳生回應：「吓！邊度嚟㗎？我唔係幾清楚。」

司機陳生續稱：「未聽過。係咪海皮個度？真係唔清楚，又無街名。（荃灣西站樓上樓盤）西鐵站樓上呀嘛，西鐵站我就知，海皮、碼頭嗰度，多數人都話去西鐵站。」記者表明身份，指在測試的士司機是否知道海之戀這個地方，司機陳生笑一笑，然後回應：「先頭俾你蝦到，所以我頭先諗係咪海皮、荃灣西鐵站嗰度，啲人通常都話西鐵站，我日日都嚟呢度。（但無人講海之戀？）無，全部都講荃灣西鐵站，今次之後我就知道啦！（咁愛炫美呢？）唔知道。（其實就是海之戀另一期）」他覺得，樓盤改甚麼名也沒所謂，但對於的士司機而言，「改個咁嘅名，我點清楚，我無留意啲樓盤!」

另一名的士司機劉先生覺得，現在樓盤名改無可改便改得奇怪，「大部份改咗，飽和，咪要諗第二啲名。啲樓盤好似酒樓名，例如甚麼軒。好似九龍站君臨天下，呢啲皇帝嘢，即係佢意思係好勁，我呢個花園係好超脫，君臨天下咁，而家慣咗唔覺，初初覺得佢九唔搭八。海之戀好似啲愛情片，如果無睇樓盤，以為問有無睇過《海之戀》，無聽過有人話去海之戀，佢又唔算古靈精怪，有啲浪漫，好似韓劇片名。」

記者：陳家雄

10萬蚊 30人分！《動腦Q》新春Q多寶
年三十至初三 3:15pm、10:30pm
豬年動腦，Q多啲money！
http://bit.ly/2Ul8W3t