高醫生噚日擔任VTC 35周年其中一項誌慶活動、健康科技中心開幕典禮主禮嘉賓,又喺典禮後同一眾老友記試玩中心嘅虛擬實境(VR)體感遊戲,一齊喺虛擬街巿買昆布、菜心同梅頭豬肉,炮製健康靚湯。雖然高醫生已好少去街市,但仍能駕輕就熟買餸,加埋佢煮餸一向注重健康,所以與同場老友記,選出健康菜式,對佢嚟講絕冇難度。
健康科技中心設於VTC機構成員IVE葵涌院校,高永文除試玩VR體感遊戲設施,仲參觀中心其他設施,例如協助訓練長者手眼協調嘅智能運動手套、提高長者下肢活動能力嘅互動地面投影系統等,亦與在場嘅老友記傾談,了解科技如何改善老友記健康。