【新增影片】
有28年歷史的《壹週刊》今日出版最後一期實體紙本雜誌後停刊，然後轉為數碼化。有閱讀10多年的讀者表示不捨，亦有在中環擺檔30多年的報紙檔主表示有忠實讀者即使不在香港，也特意請求她幫忙留一本壹週刊，讓他回港後購買。

在中環擺檔30多年的李小姐表示，「我哋由第一期賣到而家」，儼如看着壹週刊岀生。她表示，有讀者知道今日是最後一期（紙本），所以特意來買，「有啲去咗旅行，都叫我keep起一本比佢買」。她指，近年銷量已大大減少，而且讀者主要為訂閱者多，較少街客買壹週刊，「以前我哋拎200幾本（壹週刊），而家得120本到，有好多都係派上門，街買嘅一星期都係得10本8本」。她又對壹週刊停刊感到無奈和可惜，「啲人都係鍾意睇紙版，起碼望吓個封面，有得揭吓，如果無，我估佢哋唔會睇㗎喇」。

另一中環報販黃小姐擺檔10多年，她同樣表示近年越來越少人買壹週刊，「一個星期賣到70多本，比以前少五分之四」。她又表示，明白壹週刊要停出紙本的原因，「冇咩可唔可惜，而家啲人鍾意睇網上版，方便嘛」。

80多歲的讀者陳先生表示，平日會在圖書館閱讀壹週刊，他指已習慣閱讀實體版，如果停刊，就不會再看壹週刊，「我好鬼老土，都唔識用部機睇（網上版）」。對於壹週刊停刊紙本，他也慨嘆：「呢嗰世界係咁，潮流係咁，希望到我死嗰日之前都仲有報紙睇」。

閱讀壹週刊近20年的陳小姐表示，對於壹週刊的停刊紙本感到有點可惜，「我最鍾意睇有關地產、財經的故事，比只有娛樂新聞的雜誌更多元化」。她指，近年較少買實體版，大多看網上版，「冇辦法，網上係大勢所趨」。

另一讀者鄺小姐表示，同樣對壹週刊停刊紙本感到可惜，「我鍾意掲頁感覺，睇網上版始終對雙眼唔係咁好」。她又指，不少長者習慣看實體版，未必懂得上網，「冇咗紙版就好似令佢哋少咗一個娛樂」。