韓國有咁多女團，要成功真係唔易，好似成日都有唔少傳聞話女團要上位要遵守一啲潛規則，而成員之間為咗上位亦要勾心鬥角。

而Mnet亦睇準女團之間會有唔不少火花擦出，所以就會親自製作大型女團培養計劃《PRODUCE101》，呢個節目預計下月播出，而現時已經開始進行拍攝，當中節目會安排所有練習生一齊住喺宿舍內。

噚日相關人士透露：「《PRODUCE101》已經投入了初次拍攝，從各大娛樂公司選擇咗101名女練習生。其中有一部份已經進入合宿生活，喺宿舍生活，接受訓練同時進行任務。」所有參加嘅練習生都要一直一齊生活，直到選出最終出道人選。而製作組仲話會將合宿期間拍攝到女練習生們嘅嫉妒同競爭之心，將會剪輯成「惡魔剪輯」篇。

而今次參加《PRODUCE101》嘅練習生大多為10多歲嘅年輕少女，韓國不少娛樂公司都有派練習生參加，不過兩大公司SM事務所同YG事務所就冇派出練習生，據知YG因為明年將會有新女團出道，所以就唔派人，而SM因為通過SMRookies，練習生已經得到充分嘅訓練，因此拒絕選擇練習生加入節目。唔少網民就覺得YG同SM兩大公司本身都有一套培養新人嘅標準，所以佢哋就冇須靠呢個節目，而且由佢哋捧新女團，打正YG同SM旗號基本上已經會得到外界關注。不過有網民就覺得YG同SM身為大公司，佢哋唔敢玩呢個節目，因為怕佢哋派出嘅練習生輸咗就會冇面，加上呢個節目會展示女團勾心鬥角嘅一面，對於講求正面形象嘅大公司自然sayno。

《PRODUCE101》係韓國首個打破娛樂公司界線嘅競爭類真人秀，來自韓國唔同嘅娛樂公司嘅101名女練習生將展開競爭，獲得優秀成績嘅10人將組成小組展開活動。呢個項目預計將進行約一年，Mnet將為最終得勝者製作、發行出道單曲，此後還將更換成員並繼續推出新歌。當選嘅成員喺完成Mnet嘅活動之後，亦可加入所屬娛樂公司嘅組合。