英皇前3T小花劉思惠（Maggie）、鄭希怡（Yumiko）同蔣雅文（Mandy）02年出道，並以3T名義推出過一張專輯《少女碟》，最終組合解散。

囝囝似爸爸

近年喺中環置地廣場名牌鞋店Roger Vivier做sales嘅Maggie搵到親密男友小Mo，仲未婚懷孕，產期本應喺下星期，但Maggie前晚發現穿羊水，噚日生咗重約8磅B仔，兩人仲將全家福傳友人分享喜悅。
Maggie早前俾人影到獲男友接放工去拍拖撐枱腳，當時肚凸凸嘅Maggie仲犯禁嘆老麥雪糕。據知，佢哋仲未補辦結婚手續，但先組織三口之家，得閒仲拍拖買嬰兒用品。可能囝囝急住出嚟見爹哋媽咪，噚日提早喺養和出世，Maggie產後好精神，小寶寶未改名，從照片睇，頭髮唔多，但五官精緻，閉着雙眼酣睡，成個縮水爸爸咁樣。初為人母嘅Maggie噚日仲短訊回覆：「多謝，好開心，BB健康。」
撰文：馮仁昭