當年今日
關於我們

青心直說:真明麗照亮超級碗 - 胡孟青

蘋果日報 2009/10/22 00:00


特首搞環保搞出個大頭佛,以為採納民意派慳電膽可以做好佢份工,但竟然忘了有瓜田李下的人脈關係,係有意好,無心之失都好,政治敏感度低,俾傳媒大造文章都冇得怨。
先唔講低能的問題,要環保,世界大潮流係用LED燈而唔係慳電膽,因為慳電膽有水銀,棄置時對環境帶來破壞遠大於環保貢獻,而LED唔單止光,仲更加慳電,印度去年就送過慳電膽,結果又係搞到一鑊泡,最終都要低頭,3年內過百幢政府大樓將全部改用LED。
其實只要用心啲搵資料,就會發現全球LED產值在過去幾年一直有雙位數增速,預計到2012年達101億美元,呢啲資料可能特首較忙,冇乜時間睇到。另一條線索係市場資金早已見到呢個市場潛力,業績仍在倒退的真明麗(1868),走勢出現SuperBowl大圓底回升,更跑贏一眾新能源概念股。
可能個名改得太土,呢隻燈泡股上市至今一直係明燈股,股運麻麻。直至7月獲青雲創投以2.3億元入股11.27%,每股作價只係2.4元,股價隨即靜靜雞升咗一個開。
青雲創投入股證吸引
原來青雲創投係清華大學化身而成的「天使投資者」,旗下的中國環境基金,係國內首個投資潔淨能源的私募基金,規模超過3億美元。雖然唔算好大,但睇番佢哋投資、在納斯特克上市的南京中電光伏,第二季業績轉虧為盈,賺680萬美元,營業額急增九成,股價亦由谷底回升3倍幾。
現時青雲正致力將旗下,08北京奧運指定的太陽能光伏板生產商「中盛光電」上市,而青雲入股的9間公司,除掌握太陽能電池,仲有全亞洲最大的多晶硅生產、追日系統,加入真明麗,可以話完成整條由下而上的光伏產業鏈,即使真明麗未算交出亮麗業績,半年盈利倒退六成得4000幾萬元,負債近6億元,但青雲大手入股,助提升資本質素之餘,亦證明業務確有吸引之處。
不過此股累積升幅唔小,波動性亦大,短線較難纏,但長線不妨睇睇月線圖,由18蚊跌落嚟,1月至今反覆上升,就明點解耐心嘅投資者係最終勝利者。

胡孟青