利物浦前鋒史杜列治喺高普旗下正選唔多，未肯定下季仲留唔留喺利物浦，而名宿麥卡迪亞就建議，如果呢位後輩要走，巴黎聖日耳門（PSG）會係唔錯嘅選擇，但亦認為要視乎PSG最尾簽唔簽到基斯坦奴朗拿度（C朗）。

雖然史杜列治堅持喺紅軍踢得好開心，唔多想走，但如果長期踢後備，明年夏天想代表英格蘭踢世盃嘅可能性大減。麥卡迪亞就覺得史杜列治係時候離開晏菲路，仲推介佢去PSG。「我聽講韋斯咸同PSG都想簽佢，但我個人覺得佢係有能力踢PSG，尤其同卡雲尼及迪馬利亞呢啲頂級球星一隊，會好適合佢。」

麥卡迪亞仲話，C朗可能會係史獨入唔入到「門」嘅關鍵：「轉會費係其中一個問題，因為利物浦想喺佢身上攞到4,000萬鎊，咁所以就要睇C朗會唔會離開皇馬，如果佢走，下一站一定係PSG，咁球會就唔會再諗史杜列治。」

卡雲尼早前先向傳媒放話，呼籲球會要簽球星先可以爭奪歐聯錦標，否則自己都可能會走；係C朗就當然最好，咁如果換咗史獨，唔知卡雲尼當唔當對方係球星呢？