年近九旬的吳三妹婆婆，患白內障多年，情況日趨嚴重，眼科醫生建議她盡快接受手術，否則隨時有失明之虞。鑑於在公立醫院排期需時，靠綜援生活的吳婆婆又無力自付一筆手術費，憂心忡忡的她遂透過社工向蘋果基金求助。

吳三妹婆婆的個案，由香港社區組織協會轉介，社工梁姑娘表示，吳婆婆受病魔折騰，加上雙眼視力愈來愈差，多次萌輕生念頭，遂希望透過本報引起各界善心人關注，伸出援手。

公立醫院排期需時
「雙眼睇唔到，又痕又痛，滴極眼藥水都冇用，我真係好辛苦。」八十八歲的吳婆婆甫見記者，已禁不住大吐苦水。
吳婆婆晚年一身病痛，分別患心臟病、糖尿病、關節炎及血壓高，十年前開始受眼疾困擾，一直在公立醫院接受治療。
「我右眼睇唔到嘢，左眼就得番一、兩成視力，我求醫生快啲幫我做手術，佢哋就叫我要等排期，但我𠵱家排到二○○六年先有得做手術，到時我可能已經盲咗。」
眼科醫生周伯展表示，隨着醫療技術提升，當白內障影響到患者日常生活或工作時，醫生已經可以利用超聲乳化手術替病人取出混濁的晶體，毋須再像過往，要待白內障成熟才可以進行手術。
周醫生補充，白內障發展至過熟期會有一定危險，包括引致青光眼、虹膜炎等併發症，嚴重者會導致永久失明。
周醫生日前替吳婆婆診症後，證實她患白內障，右眼餘下不足一成視力，左眼視力亦只得一成左右，情況可說十分嚴重，有必要盡快接受手術。
「婆婆雙眼嘅晶體已經矇晒，連眼底都檢查唔到，我建議佢快啲攞出白內障，植入人工晶體，其間可以順便睇埋佢眼底有冇其他毛病，再決定下一步治療。」周醫生又稱，考慮到吳婆婆身體較弱，建議她分兩次進行手術，先處理情況較差的右眼，稍後再做左眼。