有搶仔前科嘅陳庭欣(Toby)近日被爆再做小三,由劉依靜(Ruby)手中硬撬身家逾億嘅彩豐行老闆楊振源(Benny),而且仲疑似為咗新歡而狠撇舊愛Warren。據知情人士透露,Benny去年底喺宴會上認識Toby後,二人以傾工作為名密密見,其後Toby趁Ruby每星期兩日返自己家過夜,就踩上Benny豪宅打邊爐同玩啤牌,感情一日千里。後來Ruby發現男友頻收短訊及來電顯示係Toby電話,覺得有可疑而向男友興師問罪,Benny都係聲稱同Toby只係朋友。
有次Toby打電話畀Benny,咁啱Ruby接聽,Ruby就宣示主權話自己係Benny女友。可惜Benny都係貪新忘舊,喺今年3月尾向Ruby提出分手。Ruby昨似暗寸Toby話:「事情已經告一段落,Benny開心就得啦,Toby又靚又好叻,祝福佢哋!我比較希望遇到番個簡單愛情。」