記：記者　N：N（勇武）　R：Ronald（和理非）

記：點睇和理非或冷氣軍師叫「散水」？

N：周不時有人叫散水，我哋都明嘅，佢哋怕我哋受傷，但係前線其實會自己衡量係咪要走，真係被人拉嗰個係我哋，咁大個人有判斷能力，總之各自努力。一切後果我哋會自己承擔，在場爭拗都無謂。要互相尊重，畀意見係OK，但係唔好帶隊走。

R：試過有次和理非同勇武都在場，和理非呢邊覺得當日目的已達成，留低無意義，點解唔退場？我哋想說服佢哋，大家圍圈傾。後來得出共識，勇武唔會主動衝擊，但佢哋同我哋講，話因為情況隨時有變，所以佢哋會守到最後一刻。其實我之前真係冇諗過原來佢哋咁諗，實際討論後，知道佢哋每人都有好清楚嘅諗法，有啲本來只係想勸人走嘅反而留低咗。勇武唔只得個勇字，佢哋有思考，反而和理非都未必一定好理性。

N：冷氣軍師同和理非都係出於善意，但唔好幫前線決定去留。

提供即時資訊 前線自決

記：咁作為前線你覺得可以點同和理非協調？

N：第一，佢哋可以幫手提供即時資訊，好重要㗎！例如幾個街口後有咩發生，有冇水炮車、係咪已被警方包抄，前線一般好忙，未必顧到其他嘢，畀多啲現場資訊前線，等佢哋自己決定點做。

另外就係如果冇gear、心理未準備好，就唔好因為八卦而走上前線，咁樣對前線手足嚟講好危險。防暴衝上嚟，如果你panic到企喺度唔識郁，要人救你就唔係太好。而家警方策略係一放彈就衝過嚟拉人，滅煙同前線需要好多空間，後排支持我哋嘅和理非朋友可以企鬆少少，畀多啲空間我哋，亦唔好上前打卡湊熱鬧。

第三，企後排嘅其實唔使咁驚，若防暴有少少舉動你哋就尖叫，會帶動其他人情緒，令其他人更驚，咁樣反而令大家唔安全。

R：到底雙方點樣合作，我都成日諗呢個問題，初時和理非唔理解，但合作係靠摸索出嚟嘅，心態好重要。

記：相反，前線可以點幫和理非？

N：2014年已做緊，一方面拖延防暴推進，畀多啲時間和平示威人士撤離，另一方面係將我哋同警方嘅武力不對等差距縮窄，警方無論喺武器、技巧、裝備上一定贏。我哋無大台、無一個靈魂人物，所有人都一定要不停思考！每一刻都要冷靜分析，唔可以懶！

-----------------------------

9.13香港之路暨齊慶中秋夜

日期：2019年9月13日
時間：晚上7時半集合；晚上8時起牽手築人鏈
地點：各區公園、遊樂設施

參加者可叫「五大訴求 缺一不可」、「光復香港 時代革命」、「我要真普選」、「平反721、831」等口號，向國際社會展示港人打不死的精神。
-----------------------------

9.15民陣遊行

日期：2019年9月15日
時間：下午3時起步
起點：銅鑼灣東角道
終點：遮打道行人專用區
-----------------------------
【撐學生】
召集有心人 撐學生全年睇《蘋果》
立即按此