「好後悔!點解唔即刻用女朋友部手機拍片同對質!」飼養有西施犬和貴婦犬的讀者香先生,昨日下午4時許,偕女朋友返回深水埗家中,途經福華街近黃竹街一間越南店舖的後巷時,赫見一個紅色膠籃上放有一隻疑似狗頭。「啲眼凸晒,上面棚牙都凸晒出嚟,好明顯見到有兩隻犬齒。」由於他手機無電,回家叉電後再落樓,該團肉已被報紙及筲箕冚住。
香先生指出,該店開業約一星期,主要做街坊生意,當時疑似店員回頭望他兩次,但沒有理會繼續埋頭苦幹,他趁機拍下相片。「之後我就返上樓報警,表示有人劏狗,但有個深水埗警署Madam話唔能夠證實,叫我call漁護署,點知搞咗10分鐘,最尾都係pass返畀警方。」
香先生續稱,直至傍晚6時許,才有警員到場,但沒有發現所說的狗肉。警方回覆他稱,因沒有任何實物證據,只會作備案處理。香先生對此感到氣憤:「如果警方可以4點半嚟到,或者5點鐘嚟到,係會捉得到,而唔係捉唔到!」
警方發言人稱,昨日下午5時42分接獲一名男子報案,稱有食肆店員處理狗肉,惟警員到場調查,48歲姓黎老闆娘否認事件,而警方只在店內尋獲鴨頭及鴨肉,案件改列作誤會處理。
香先生認為:「好荒謬,我點會鴨肉同狗肉都唔識分,啲肉有狗肋骨的形狀,明眼人一睇就知道啲肉係狗肉,而唔係鴨肉!」養狗有5年經驗的他對事件感到擔心,指出會趁夜晚該店收舖才放狗,返工時會「鎖實晒門窗。」