一連20場劉德華「My Love Andy Lau 劉德華 World Tour」跨年演唱會，噚晚喺紅館開鑼，闊別紅館8年，亦係去年初墮馬意外後首度再開演唱會，太太朱麗倩罕有咁帶埋6歲囡囡劉向蕙公開去捧場，當然唔少得仲有華仔父母啦！

頭場演唱會圓滿結束後，華仔在後台接受訪問，講到整晚表現，佢話：「有啲興奮、有啲緊張、又有啲攰，我覺得台下分數比我仲高，啲觀眾真係不得了，我自己都係幾好嘅分數，大約60分左右啦！有時見到觀眾咁開心，會令到我好忘形。」太太同囡囡畀幾多分？華仔話：「我未問喎！」阿女睇到手舞足蹈喎？華仔笑住反問：「係咪呀？」對於甚少公開睇騷嘅太太同囡囡都睇足全場，華仔開心話：「第一次，係呀！佢（向蕙）係第一次睇演唱會。」

演唱中途，天幕投影一啲小朋友畫作，華仔笑指係囡囡畫嚟交功課，不過由於阿女仲細，所以版權都係爸爸擁有嘅。問到係咪太太主動要求去睇騷？華仔直言：「我叫㗎嘛！我係一家之主，梗係我叫。」至於會唔會睇足咁多場，佢就話會由太太同囡囡自己話事，不過佢笑指都驚阿女睇完一場之後唔再睇。

華仔為咗照顧山頂嘅朋友，企上只得一個人身位嘅吊台，環繞紅館轉，又時而升高時而降低，好似喺觀眾頭頂飛過一樣，都睇到心驚膽跳，華仔就話好安全：「視覺係好啲，我自己都淆底，不過體力還好，還可以撐下去。」不過唱medley部份因為跳舞時間好長，佢承認感覺越跳越重。而觀眾好期待華仔除衫騷肌，可惜好夢成空，華仔笑話今次除，以後都要除。

一直好照顧歌迷嘅華仔，每次演唱會都會安排握手時間，但今次就取消咗握手環節，佢解釋：「醫生話我最驚突然chok親，就算坐車我都叫司機唔好突然剎車，後面車撞埋嚟係最危險，o依家坐車都驚。見我成日望地（演出時），因為Spotlight太光，遮住我睇唔到地，我都要好小心。」

至於發現黃牛飛同假飛事件，華仔話：「紅館同我哋講會處理，我之前都拍過片去呼籲，每張飛都好小心，大家可能買到假飛，又係一心一意嚟支持我都幾忟，希望大家冷靜少少去處理，多謝警方同紅館協助。」

另外，華仔所屬公司「映藝劇團」最近捲入欺詐傳聞，日前喺九龍灣公司樓下有口罩男拉橫額，據報係一間叫「聚善美」公司指映藝劇團單方面終止佢哋投資劉德華演唱會嘅資格，而投資款項就被沒收。對此，華仔回應話：「我冇正面去跟進過，因為我用咗所有時間去準備演唱會，交由公司律師去處理。」

精選娛聞，喺晒《娛果》
http://fb.com/appledailyent