2017香港小姐今晚假座電視城舉行，上屆奪得港姐「友誼小姐」嘅張寶兒今晚亦有到港姐現場支持妹妹10號張寶欣，佢行完紅地毯後接受傳媒訪問，佢話覺得妹妹今日狀態唔錯，希望佢可以做到最好，並寄語一班師妹，要盡力而為，令自己人生無悔。

對於公開與袁偉豪拍拖後，被妹妹爆經常甜笑，寶兒笑晒口話﹕「我平時都喜歡甜笑，本性嚟。」袁偉豪曾在訪問中話「不想錯過寶兒」，問聽到係咪好冧？佢話﹕「我有睇新聞，謝謝，哈哈。(男友係咪100分？)冇人係100分，我都唔係，只要大家接受大家嘅唔完美，肯接受就ok。」

對於兩人年齡相差11年，寶兒覺得最重要係溝通，唔覺有代溝，問袁偉豪係咪大細路？佢話﹕「其實每個人心中都有童真，大家興趣相近，能溝通就可以。」父母滿意嗎？寶兒話﹕「佢哋未傾過偈，要安排佢哋見吓先。」