踏入狗年，第一單最大嘅政治新聞當然係45條關注組組黨，喺過年前班大狀已經簡單滙報咗組黨進展，重話三月必定成事，目前正係擇緊良辰吉日。嗱，八方姑且提一提，三月北京好忙，因為要開人大政協會議，如果大狀黨喺三月上旬成立，班記者就可乘機喺人民大會堂做埋領導反應，如果唔想刺激中央，就遲啲先算。
以湯家驊、余若薇、吳靄儀同梁家傑牽頭嘅君子黨，重未展開籌款，目前只有五百大元打底，聽講由於政改事件，45條已受壓，報紙廣告同蘋果一樣被人抽起。八方問李志喜有冇壓力，準備點應付？李大狀好淡定話，壓力當然有，但最重要係佢哋認為啱就去做，唔理得咁多。
李志喜嘅答案就係咁直截了當。呢位前起草委員李福善嘅女兒係李家極品，她嘅堂兄弟李國寶、李國章及李國能同政府坐同一條船。寶哥哥係行政立法會議員；亞瑟王係問責高官；李國能係終審法院首席法官，一家皆從政，偏偏志喜有個人獨特風格，既不當權貴，也不出風頭，一直沉實咁為港人做事，有需要時就企出嚟。

同老父食飯唔講政治

有知情人士話，李志喜英文比中文好，下次有提問，要請佢用英文回答，一定更多驚喜。起草基本法之時，八方同李官（李福善曾做過上訴庭法官）甚多接觸，知佢同夫人都好愛國，而且排英，但係有啲盲目，北京講咩都好；但係佢哋個女反而更重視原則價值，有時同老父唱反調亦在所不計。聽聞佢兩父女同枱食飯，都盡量唔講政事。
李福善式老愛國人物香港已經太多，我哋需要更多李志喜，為港人說話，為港人企出嚟。一國兩制係新事物，基本法係一紙條文，點樣落實唔俾人曲解誤導，需要愛港人士共同努力，願狗年港人創出奇迹。


爆料熱線：29290000、27860099
報料傳真：26239278
報料電郵：[email protected]