【熱血點五步】熱血勵志電影《點五步》昨日票房已衝破200萬元，相對一部小成本製作電影已算難得。棒球跟足球一樣，要靠團隊合作，前日一班《點》片沙燕隊成員二叠手岑珈其（陳強）、捕手柯煒林（牛屎）、三叠手黃定謙（力王）及隊長兼外野手黃焯璘（班長）接受訪問，談到片中難忘場面，他們都不約而同想起飾演教練的廖啟智幾場戲。
陳強表示有場講述隊員邊跑邊唱「鬼叫你窮呀，頂硬上……」的戲份，令智叔大怒要掌摑各人，他說：「原本智叔係借位，試咗之後，導演覺得假，要真打。我第一個被打，真係好痛，點知打到第5個嗰陣，聽到智叔講『你閃呀，你閃』。終於要由頭打過，我同班長都一日打咗兩巴。」

拍沖涼戲捱鬧

牛屎和力王同樣認為贏波那場喊戲最感人，牛屎說：「嗰場智叔見我哋喊唔出，佢捉咗我哋圍咗個圈話『你哋諗吓，無論作為沙燕隊隊員，或者呢套戲嘅演員，做呢個角色都十幾日，你諗番個角色帶畀你哋乜嘢，你自自然就會喊』，之後就好型咁走開。跟住一班演員就自發喺度討論，唔使幾耐班大男孩已經喊到收唔到聲。」黃定謙話現場氣氛令你好自然投入，他說：「嗰場喊戲拍到第二次嘅時候，本來喊唔出，忽然智叔喺場邊大叫『沙燕隊，你哋贏咗嘞』，即刻又喊到出嚟。」
反而班長的遭遇比較特別，他說：「出浴嗰場戲，畀班隊友話我着底褲沖涼，之後成班人衝入嚟除咗我條褲。」班長因為那場戲被家人鬧：「屋企人睇完套戲，返到屋企畀媽咪鬧『衰仔邊個畀你拍啲咁嘅嘢』。」
採訪：何永寧
攝影：葉君海