女士若然未婚就從政,好多時從此孑然一身,59歲嘅黃大仙區議員譚香文(Mandy)似乎好有感受,自爆當年喺英國讀書仲有少少「艷遇」,畢業後卻幾乎「乏人問津」,笑稱:「從政真係死多幾錢重,好容易浪費青春,盛女(從政)一定要三思呀,哈哈~」Mandy有八兄弟姊妹,佢排第3,何文田木屋區呱呱墮地,「所以叫『香文』,紀念喺香港何文田出世」,後嚟木屋大火而遷入紅磡東頭邨徙置大廈。佢自稱係奀皮妹,小學試過俾老師罰坐無影凳,但亦做過風紀隊長。中一至中五讀文理書院,中六同中七就讀基督教女青年會丘佐榮中學;考唔到港大,去母校文理書院教書,年半儲夠錢就赴笈海外,英國密德薩斯大學文學士畢業後喺會計界打滾,其後仲從政。