敏妮Talk:供兒童保單為乜? - 溫敏妮
噚日講到兒童保單嘅問題,敏妮收到一個網友提及,畀錢買保單嘅父母會唔會咁儍,將保單權益人嘅權利轉畀個仔女?又或者當子女大個時,難道就會自動知道父母幫佢供咗份保單?呢位網友更加提醒敏妮,保單權益人係保單嘅控制人,可以取消整份保單,攞番啲錢,仔女一個仙都冇。
講到爸爸媽媽取消整份保單,攞番啲錢,仔女一個仙都冇,似乎激咗少少。不過,敏妮同保險朋友提到網友嘅意見,佢就話,佢家保險公司處理兒童保單時,會有兩種辦法,第一種係喺爸爸媽媽幫仔女買保險時,已經決定當仔女一到18歲就自動更改保單權益人,咁保險公司會喺呢位小朋友18歲時,出一封信確認保單權益人轉變,主要目的係攞番小朋友嘅簽名印鑑。所以點解仔女到18歲會知爸爸媽媽幫佢供咗份保單。
另一種處理方法係,父母等到仔女滿18或者21歲時,先考慮是否更改保單權益人。保險朋友開玩笑話:「爸爸媽媽到時可以睇吓仔女係咪忤逆,先決定轉唔轉保單權益人。」如果唔轉嘅話,的確可以好似網友所講,cut咗張單,不過,可唔可以攞番啲錢敏妮就有保留。因為壽險保單之所以攞到錢,係因為投資嘅紅利,通常無得十零廿年都未成氣候。據保險朋友講,好少父母真係仔女一出世就幫佢買保險,好多都係等佢上小學,甚至中學先至買,計吓數,上小學6歲,讀中學更加係十幾歲,供得嗰幾年就cut咗張保單,分分鐘要蝕。
當然父母可以選擇一切唔變,當仔女18歲時,繼續成為保單權益人,不過,如果仔女一直唔係保單權益人,甚至唔知有呢份保單,仔女會唔會供呢份保單呢?咁即係話如果父母要keep住份保單,就要自己供,再諗,如果仔女都幾十歲,做父母嘅除非諗住自己長命過仔女,否則呢份保單嘅作用係乜?
其實,爸爸媽媽幫仔女供保單,相信只係出於關懷同愛。敏妮相信,父母只係想為仔女儲多個錢。
不過,儲錢有好多方法,買份兒童保險嚟儲錢,效益有幾高就真係要諗諗喇!
http://wanmanli.com/blogs/