馬田斯本來繼承舒利亞嘅9號球衣應該會令球迷充滿期待，估唔到連「老舒」嘅黑氣都繼承埋，馬田斯首次替紐卡素上陣比賽就因為比賽中途受傷提前離場，認真黑仔！
舒利亞係因為比賽中受傷關係，無法完美地完成球季賽事而被迫提前退休，估唔到着住佢件9號球衣嘅馬田斯，第一場比賽就中招，踢咗大半場就因為大腿受傷而退下火線，真係唔做舒利亞繼承人都唔得。不過，不幸中之大幸就係馬田斯傷勢比預期輕，而且聯賽因為國際賽期日而停賽兩星期，有足夠時間畀馬田斯休養，「紐記」都算好彩，領隊羅達亦可以鬆番一口氣。

奧雲盧基排隊傷

其實，近一、兩年，紐卡素前鋒好似俾人詛咒過一樣，一定離唔開受傷，除咗舒利亞之外，奧雲喺世界盃決賽周時扭傷咗膝部韌帶之前，亦曾經因為腳部骨折而休息四個月，重有艾美奧比上季亦傷過一段時間，而且仲要因為球隊唔夠前鋒，要帶傷上陣；亦可擔任前鋒嘅盧基當然不能倖免，上季加盟不足一個月亦拉傷腿肌曾經缺陣兩個月，今次專程收購馬田斯又受傷，難怪羅達話要喺球員轉會市場關閉前要羅致多三個球員先至可以有足夠兵源調動囉！
「本來羅致馬田斯為解決前鋒人腳不足問題，點知逃唔過紐卡素前鋒受傷魔咒，幸好及時有國際賽期，有兩星期時間畀佢休養，而且傷勢較預期中輕，都算叫做不幸中之大幸。」