特首林鄭月娥用緊急法推蒙面法之後，止暴制亂不見有效，反而令警民衝突進一步擴大化，社會上有識之士均認為動用緊急法屬下下之策，惟獨建制派大力推許，如行政會議成員葉國謙等人，更力倡要將緊急法加碼，推封禁互聯網。有民主派中人指，建制陣營不止推蒙面法，而是想推宵禁、網禁、甚至限制提款等，將社會矛盾推到最盡，從而達到他們真正目的：取消區議會選舉，亦為日後可能連立法會選舉也押後甚至取消鋪路。

「覺得講講吓就變真」

該民主派人士稱，有內地中間人對他說，建制派過去一段日子不斷向中、港政府做工夫，力推港府用緊急法推蒙面法，「佢哋不斷話港府一定要做嘢，唔可以乜都唔郁」。事實上官場也對推蒙面法有保留，擔心會有反效果，「但呢個時候理性分析冇人聽，一句止暴制亂就幾唔合理都照做」。結果一如分析，蒙面法只能火上加油而不能止暴制亂，但對建制而言並不重要，「佢哋𠵱家話唔係蒙面法唔得，係要用緊急法推其他更辣規限，好似宵禁、網禁等，佢哋要將香港搞到真正戒嚴先得」。以他所知，那些宵禁、網禁消息，不少由建制陣營放出來，「佢哋覺得講講吓就變真」。

一旦去到這一步，自然就是取消區議會選舉，該民主派人士指建制的盤算是，「其一是怕輸，唔使選就最好」，他更聽過有建制派提過可修改法例，令現屆區議會延任到有選舉為止，但更重要是建制派相信，即使示威平息，明年立會選舉建制派選情一樣不樂觀，「只要有押後、取消區會選舉先例，如果出年立會選舉又係咁，到時咪可以照辦煮碗搞立會選舉」。

季陶
周一、三、五刊出