「皇后衞士」何來同朱凱迪早前突然被政府追索27萬元訟費，唔少網民睇唔過眼，原本呼籲「香港一人一蚊」掟響律政署行動，家已升級為「香港一人十蚊」。有網民話，如果政府唔收硬幣，可以唱十蚊膠鈔，再將每張銀紙製成一個「膠球」，名副其實「派膠畀政府」。

等律政署追數

有網民亦度橋，叫每人寫一定數額嘅「借據」畀朱凱迪，等朱凱迪成為「債權人」，當政府追數時，就可能拎上法庭，討論點樣向幾千個債仔追債。對於網民力撐，朱凱迪話多謝大家支持，建議大家加入「捐十蚊的承諾」，目標係登記27,000人，之後佢會同何來去信律政署，再附上登記人名單，表明兩人無力還款，如果律政署係都要追數，登記人就會組織起嚟交數。
成立facebook群組嘅成員話，相信政府見到本土行動有力支付訟費時，威脅朱凱迪嘅企圖就會成空，大家家可以做嘅，就係支持今次行動，將姓名、電話，電郵去mailto:[email protected]。