中環在線:證券界春茗「4條Dee」好日子 - 李華華

蘋果日報 2011/02/23 00:00


代表本港證券業嘅七大商會,噚日首次聯合舉行春茗酒會,唔使行家走咁多場,而且揀係2月22日星期二好日舉行,「4條Dee(2)」唔知係咪寓意今年港股要繼續威盡!不過港股噚日嘅表現,就認真大吉利是啦!
個春茗酒會都有成700人出席,場面鼎盛。財經事務及庫務局、證監會、港交所,以至中聯辦財金官員都畀面出席。各商會主席會長輪流同大家拜年,包括香港證券業協會、香港中資證券業協會、證券商協會、香港證券學會、香港證券及期貨專業總會、香港專業財經分析及評論家協會,同埋香港網上經紀協會。
咁多人講嘢,真係呢頭講完,嗰頭就唔記得啦。華華覺得最啱聽嘅賀詞,係香港專業財經分析及評論家協會會長藺常念嘅「買邊隻股升邊隻!」