財爺唐英年下禮拜三公布新一年度嘅預算案，為咗預祝煲呔連任，一早就事先張揚有糖派，減稅、免收差餉、增加社福開支，總之要皆大歡喜；但係1983年嘅預算案就冇咁好景喇，當年2月23號，財政司彭勵治宣讀一份赤字達62億元嘅預算案，係自73年以嚟港府預算案第一次見紅。
為充實庫房，彭勵治建議有11樣嘢要加稅，煙、酒、汽油、機場稅、博彩稅連銀行牌費都要加，總之想盡辦法搵錢填氹。當年市民同議員都好純品，對加、加、加反響唔係好大。彭勵治用咗兩個鐘頭10分鐘先讀晒成份預算案，議員當催眠曲咁聽，直到聽到要加稅先至驚醒。