影帝艾迪烈柏尼（Eddie Redmayne）主演電影《哈利波特》（Harry Potter）外傳電影《怪獸與牠們的產地》（Fantastic Beasts and Where to Find Them）即將上映，電影已宣佈會拍成五部曲，尊尼狄普（Johnny Depp）將會參與演出。消息指尊尼會喺《怪獸與牠們的產地》客串一角，埋下伏線為日後嘅續集鋪路，暫時未知尊尼會演咩角色，不過外界估計佢應該係飾演「史上最危險的黑巫師」蓋勒葛林戴華德（Gellert Grindelwald）。

尊尼涉向前妻安芭赫德（Amber Heard）家暴兼離婚訴訟雖已告一段落，但已經難以洗去尊尼嘅負面形象，而哈利波特迷知道佢有份演出《怪獸與牠們的產地》系列之後都極為反感，陸續喺《哈利波特》作者羅林（J.K. Rowling）同電影官方網站留言，網民大多係話對電影選角感到失望，更不滿尊尼喺涉虐妻之後，仍然受荷李活片商重用，搵佢演出一個咁重要嘅角色。