劉心悠、周柏豪、鄭欣宜、許廷鏗同Super Girls等，今日喺尖沙嘴出席港台「郁一郁.健康啲」啟動禮， 心悠話因為準備下周五嘅芭蕾舞演出，近排全身上下都係咁郁動，而柏豪都話因為巡迴演唱會，自己不斷健身，佢話：「之前同心悠拍劇嘅時候，見佢廿幾、三十日都只係食白烚雞同菜，嗰陣時覺得呢啲唔係人嘅生活，點知o依家輪到自己keep fit，每日都係食呢啲，好多謝心悠對我嘅啟發，o依家自己都好enjoy，因為見到出到嚟個人好乾淨，好fit咁，好有滿足感。」

o依家有幾多嚿腹肌？柏豪話：「已經有8嚿㗎喇！」心悠大讚柏豪有型之餘，仲好好奇咁問柏豪覺得女仔應該有幾多嚿腹肌先靚？柏豪話：「6嚿夠㗎喇，唔好8嚿，不過心悠點都係靚。」o氹到心悠鬼咁開心。

柏豪仲笑話冇得過番以前正常人嘅生活：「冇㗎嘞，一路都係咁，有時都會獎勵吓自己，食火鍋同煎炸嘢，但係都主要係食清淡嘅，太太都會每日整沙律畀我帶兩餐，我會帶自己飯盒、飲管同水樽，健康又環保，希望帶畀大家一個榜樣，有帶動作用。」

另外，Super Girls平時都有一齊練舞當運動，不過佢哋就爆Yanny（陳穎欣）最懶，連人有三急都唔願去洗手間、有嘢都懶得講。提到聖誕節，佢哋就話到時會有工作，所以冇得去旅行，佢哋仲笑言會夾份送張心意咭畀Cheronna（吳嘉熙）男友黃奕晨，因為對方成日做「柴可夫司機」，車佢哋出入。

精選娛聞，喺晒《娛果》
http://fb.com/appledailyent