韓國天團BIGBANG嘅隊長G-DRAGON（GD）今年6月開始展開世界巡迴演唱會，上月佢已唱到來香港，而今晚就會喺吉隆坡開騷。

GD噚晚近10點抵達吉隆坡，雖然當地天氣高達30幾度，不過GD就好抵得熱，戴住藍色冷帽現身，同行仲有同門嘅2NE1前成員Sandara，今次已係Sandara繼菲律賓個場後，再任GD演唱會嘉賓。而GD同Sandara雖然曾傳過緋聞，但佢哋都唔避忌，孖住飛去吉隆坡。

而GD噚日喺韓國出發時，喺仁川機場就撞到隊友勝利，由於GD最近都忙於世巡，所以冇乜時間同隊友見面，當佢發現勝利架車時，即時興奮行到車前，仲趴喺車窗同勝利打招呼，勝利見到GD都即時拉低車窗，兩人即時把握時間噓寒問暖一番，認真好感情。

另外，GD嘅胞姊權多美近日就被英國媒體選為全球最具影響力500位潮流人物。