要數香港最具動員力嘅左派組織，一定唔少得港區省級政協委員聯誼會，聯誼會喺11年前由中聯辦支持下成立，港區省級政協常委同委員一律自動成為會員，就算卸任嘅亦可申請，所以計計埋埋會員人數多達二、三千，難怪每逢香港有各式選舉，總會有消息流傳，聯誼會積極動員助選，為愛國愛港出一分力！

建制圈子近日流傳，聯誼會換屆在即，接班人已經揀定，有傳現任常務副會長施榮懷將會接替譚錦球出任會長，另一個常務副會長鄭翔玲就會接任主席。施榮懷嘅爸爸施子清係福建幫大佬，亦係全國政協前委員，佢本人則係「雙料」政協，同時係北京市政協常委及全國政協委員，夠晒根正苗紅，而佢近年落力幫手反佔中，唔通真係無功都有勞？

八方問過施榮懷，佢直認稍後會接棒做會長；問及過去每逢選舉關鍵時刻，聯誼會都會發功為建制候選人拉票、甚至各區有必保名單等，咁佢上任後係咪會延續呢方面嘅工作？佢話明唔會做踩界嘅事，但強調擁護《基本法》同支持一國兩制，係港人嘅共同心願。