現年26歲的傅穎入行9年，事業發展未見突破，緋聞是非卻一大籮，為求突破，她將於今日出發到北京定居再打江山。不過她昨日臨別秋波在港出席最後一次公開活動時，竟突然爆大鑊，自揭上月與羅仲謙分手之餘，更數臭謙仔是大話情人劈腿一腳踏四船，甚至爆大鑊上月二人為分手爭拗時，遭羅仲謙暴力對待，令她身心受創，一字一句擺明要跟羅仲謙玉石俱焚。羅仲謙昨日召開記者會，眼濕濕頭耷耷否認向舊愛動粗，揚言是為勸止情緒激動的傅穎時不慎鍊瘀她。

傅穎（Theresa）與羅仲謙的緋聞一直疑幻疑真，直至昨日，Theresa出席公開場合時一次過承認她與羅仲謙曾經拍拖兼且已經分手，又狂數羅仲謙曾向她施以暴力，將前度插到體無完膚。

「好似精神折磨自己」

Theresa昨日在旺角出席BSX服裝品牌活動，透露今日將出發到北京定居和工作，開拓內地市場，提到日前她暗示自己感情受騙，並因為受傷害而晚晚落淚，她淡然說：「曾經發生過，喺自己入行之後，家放低咗，唔想講。」直至記者幾番追問，她始說：「曾經有段感情令自己身心受創，我講嘢一直俾人覺得支吾以對，其實自己有好多顧慮。我所講嘅嘢係真心話，呢段時間日日諗，好似精神折磨緊自己，所以好想宣洩一吓。好唔好彩發生咗啲事，啱啱喺我出碟嘅時候，我冇講大話。」

「我唔知佢已有女友」

去年底羅仲謙被指一腳踏兩船，其後Theresa公開力數羅仲謙「冇句真、冇誠信」時，剛巧她推出新唱片，因而被認定她博宣傳自製新聞，但Theresa昨日強調說：「我全部都係真心話。」究竟發生甚麼事？她說：「我係同羅仲謙一齊過，我哋分開咗唔只一次，佢背叛亦唔只一次，呢段關係令到我身心受創，想去北京前放低所有嘢唔再諗。」
Theresa自爆去年跟羅仲謙拍拖，卻不曉得自己原來做了第三者，她說：「同羅仲謙拖拖拉拉咗年半，由2010年開始，當時佢已經有女朋友，但我唔知道，佢喺度講大話，佢話當時同女友已經分手。自己做錯咗，做得最錯係再同佢一齊，後尾我發現佢唔只冇同女朋友分開，佢身邊原來同時仲有兩個女仔出現，當時自己打擊好大，我揭穿呢件事，但我淨係同身邊朋友講，冇同公司同事講。」

「啲瘀傷唔係跌親囉」

Theresa越講越激動，聲音開始抖震及沙啞起來，她說：「當時除咗自己個心好難受之外，亦都有傷害過我身體，我同朋友講係跌親。」問到是否羅仲謙打她？她說：「我係有好多瘀傷，嗰啲瘀傷唔係跌親囉。」身體瘀傷究竟是何時發生？怎樣發生？Theresa未肯正面回答，只說：「係因為嗌交，我哋上個月先分手。」
為何當日不報警求助？Theresa說：「冇諗過，我今日要講出嚟，係想放低成件事，因為我要去北京。其實上個月嘈交嗰陣，係有郁手郁腳。」有記者問羅仲謙有沒有使用攻擊性武器打她？Theresa表示沒有，並說：「總之講完唔想再講，以後亦唔想再提呢個名。」
採訪：王崇穎　攝影：仇志德

傅穎巨胸謙爭執示意圖

話你知：緋聞是非博出位

現年26歲的傅穎以女子組合Cookies成員身份出道，05年獨立發展至今9年，唱歌拍戲寫書瓣瓣試過，可惜冇樣掂，又經常惹事生非，堪稱是非女王。

《惡鬥Stephy》
與宿敵Stephy（左）傳不和，之後兩人同屬金牌又爭做一姐，傅穎被指唱衰Stephy。

《自製緋聞》
常被指自製緋聞，除自爆與羅仲謙拍拖，早前又偷嗒周秀娜男友Avis（圖），又傳與DJ啤梨遊長洲。

《唱衰金牌》
09年金牌大地震，傅穎被投閒置散，之後她自爆發律師信給公司解約，但舊約未清又加入新公司，搞到一鑊泡。

《愛情騙子》
傅穎09年出書提到在圈中遇愛情騙子，惹來外界猜測，矛頭直指金牌太子爺鄭中基，令鄭相當不滿。

《句句走音》
傅穎唱歌一向唔掂，09年她上《勁歌》現場唱《花吃了這女孩》直情句句走音。

《爆窗報警》
去年尾傅穎在微博宣稱睡房玻璃窗疑被人用重擊破壞，碎片散落一地，她懷疑是偷窺狂所為，報警求助，但有人質疑她博宣傳。

《稱遭竊聽》
傅穎連住都惹是非，08年她自爆西環寓所門外現竊聽者，但遭保安指她作料累他被炒；09年傅穎又被投訴在單位製造噪音，在屋苑亂拋垃圾及呼喝清潔工。

資料來源：《蘋果》資料室